Антанюк Георгій Аляксандравіч // Малая радзіма вялікіх людзей :інфармацыйна-бібліяграфічны паказальнік да 460-годдзя з часу першага згадвання ў гістарычных крыніцах в. Мацы Кобрынскага раёна / Кобрынская раённая цэнтралізаваная бібліятэчная сістэма, цэнтральная раённая бібліятэка, аддзел абслугоўвання і інфармацыі ; склад. С. Д. Курачук. – Кобрын : Цэнтральная раённая бібліятэка, 2023. – С. 12-13 : фат. — (Серыя «Па вёсках нашага краю»).
АНТАНЮК ГЕОРГІЙ АЛЯКСАНДРАВІЧ
беларускі філосаф, сацыёлаг, даследчык прадметнай логікі, метадолаг сістэмнага падыходу ў сацыялогіі, адзін з першых распрацоўшчыкаў метадалогіі сістэмнага падыходу
ў сацыялагічным даследаванні
Георгій Аляксандравіч Антанюк нарадзіўся 13 лістапада 1942 года ў вёсцы Мацы Кобрын-скага раёна Брэсцкай вобласці ў сялянскай сям’і. Бацька, Аляксандр Барысавіч Антанюк (1911–2003), быў кавалём; маці, Надзея Данілаўна (у дзявоцтве Яфімук; 1924–1996), працавала паляводам. Дзяцінства Георгія прыпала на нямецка-фашысцкую акупацыю, пасляваенную нястачу.
У 1949–1953 гадах Георгій вучыўся ў пачатковай школе ў вёсцы Мацы, у 1953–1959 гадах – у сярэдняй школе ў вёсцы Стрыгава, скончыў 10 класаў. Пасля заканчэння школы паступіў у Магілёўскі машынабудаўнічы тэхнікум, атрымаў спецыяльнасць «тэхнік-тэхнолаг зварач-най вытворчасці». Праходзіў тэрміновую службу ў Савецкай арміі (1962–1965).
У 1965 годзе Георгій Антанюк паступіў на дзённае аддзяленне філасофскага факультэта Ленінградскага дзяржаўнага ўніверсітэта па спецыяльнасці «філосаф», які скончыў у 1970 годзе. Вучыўся ў аспірантуры Інстытута філасофіі і права АН БССР (1970–1973). З 1973 года працаваў спачатку малодшым, потым старшым навуковым супрацоўнікам Інстытута філасофіі і права АН БССР (цяпер Інстытут філасофіі Нацыянальнай акадэміі навук Беларусі), прымаў удзел у правядзенні прыкладных сацыялагічных даследаванняў.
У 1974 годзе Г. А. Антанюк абараніў кандыдацкую дысертацыю па тэме «Системный подход в социологическом исследовании (методологические проблемы исследования взаимоотношения социальной системы и её компонентов), атрымаў ступень кандыдата філасофскіх навук.
З 1980 года па чэрвень 2004 года – выкладчык, старшы выкладчык, дацэнт, прафесар на кафедры філасофіі АН БССР (з 1991 года – НАН Беларусі, з 1998 года – у складзе Інстытута філасофіі НАН Беларусі, з 2002 года – Інстытута падрыхтоўкі навуковых кадраў НАН Беларусі).
У 1990 годзе Г. А. Антанюк абараніў доктарскую дысертацыю па тэме «Социальное проектирование (теоретико-методологический аспект)». Доктарская дысертацыя прысвечана тэорыі і метадалогіі праектавання сацыяльных адносін у кіраванні грамадствам. Доктар філасофскіх навук (1991), прафесар (1993).
Г. А. Антанюком апублікавана звыш 70 навуковых работ на папяровых носьбітах і звыш 100 навуковых прац выкладзены для ўсеагульнага доступу ў Інтэрнэце. Аўтар прац па праблемах сацыяльнага кіравання, сацыяльнага праектавання і міжэтнічных адносін: «Социальное проектирование и управление общественным развитием: Теоретико-методологический аспект» (1986), «Социальное проектирование в процессе практического применения социальных знаний» (1992), «Объективная цель человечества и его стандартизация» (2003) і інш. Адзін з аўтараў кнігі «Сацыяльна-філасофскія праблемы вытворчасці і выкарыстання навуковых ведаў» (1992).
Прафесар Антанюк – наватар у распрацоўцы метадалогіі сацыяльна-інжынернага праектавання, прысвяціў гэтай тэме шэраг грунтоўных работ. Ён лічыцца адным з вядомых футуролагаў, даследчыкаў прадметнай логікі, сацыяльных інжынераў-метадолагаў сацыяльнай інжынерыі і сістэмных падыходаў у сацыялогіі. З 1990-х гадоў Георгій Аляксандравіч паступова пераходзіць да крытычнага пераасэнсавання філасофіі і ў цэлым ідэалогіі як крыніцы аб’ектыўнага пазнання. Даследуе агульнасацыяльныя і агульнафіласофскія праблемы, вывучае праблемы сістэмнага падыходу ў сацыялагічным даследаванні, метадалогіі навуковага пазнання, а таксама маралі, палітыкі, ідэалогіі і дзяржаўнага будаўніцтва, рэлігіі, нацыянальна-этнічных адносін і інш. З 1992 года рэгулярна публікуецца ў СМІ па розных актуальных праблемах Беларусі і Расіі і праблемах, якія існуюць ва ўзаемаадносінах паміж краінамі.
Не забывае ніколі Георгій Антанюк пра сваю малую радзіму. Пра гэта яскрава сведчыць і адзін з яго артыкулаў у газеце «Збудінне» — «Заходнія палешукі: іх шлях да сусветнай гісторыі (кароткая гістарычная даведка)».